Amo 3 | NdeIBE | STEP | Zwanini ilizwi elikhulunywe nguJehova ngani lina bantu bako-Israyeli

Amos 3

Ofakazi bokumelana lo-Israyeli

1 Zwanini ilizwi elikhulunywe nguJehova ngani lina bantu bako-Israyeli – ngomndeni wonke engawukhupha eGibhithe:

2 “Yini kuphela engalikhethayo kuyo yonke imindeni yasemhlabeni; ngakho ngizalijezisela zonke izono zenu.”

3 Ababili bayahamba bebonke ngaphandle kokuba bevumelene ukwenzanjalo na?

4 Isilwane siyabhonga ehlathini kungelalutho esingalubamba na? Siyabhonga esikhundleni saso singabambanga lutho na?

5 Inyoni iyabanjwa emhlabathini okungelamjibila othiywe khona na? Umjibila uyathanca usuke emhlabathini kungelalutho olubambayo na?

6 Lapho icilongo likhala edolobheni abantu kabethuki na? Lapho incithakalo isehlela idolobho kayenziwanga nguJehova na?

7 Impela uJehova Wobukhosi kenzi lutho engavezanga icebo lakhe ezincekwini zakhe abaphrofethi.

8 Isilwane sibhongile – ngubani ongayikwesaba na? UJehova Wobukhosi usekhulumile ngubani ongeze waphrofetha na?

9 Memezelani ezinqabeni zase-Ashidodi lasezinqabeni zaseGibhithe lithi: “Buthanani phezu kwezintaba zaseSamariya; libone isiyaluyalu esikhulu phakathi kwayo lokucindezela phakathi kwabantu bayo.”

10 “Kabakwazi ukwenza okulungileyo,” kutsho uJehova, “bona ababuthelela impango baphange lasezinqabeni zabo.”

11 Ngakho uJehova Wobukhosi uthi: “Isitha sizachitha ilizwe; sizadiliza izinqaba zenu, siphange izinqaba zenu.”

12 Nanku okutshiwo nguJehova: “Njengomalusi ehlenga emlonyeni wesilwane amathambo amabili kuphela omlenze loba isiqa sendlebe, bazahlengwa kanjalo abako-Israyeli abahlala eSamariya bethithibele ekucineni kwemibheda yabo, kanye laseDamaseko phezu kwemibheda yabo yokuphumulela.

13 “Zwanini lokhu lifakaze ngendlu kaJakhobe,” kutsho uJehova, uJehova uNkulunkulu uSomandla.

14 “Ngosuku engizajezisela u-Israyeli izono zakhe ngizabhidliza amaalithare aseBhetheli; izimpondo ze-alithare zizaqunywa ziwele emhlabathini.

15 Ngizadiliza indlu yebusika kanye lendlu yehlobo, izindlu eziceciswe ngezimpondo zendlovu zizadilizwa lezindlu ezinkulu zizabhidlizwa,” kutsho uJehova.